கன்னியாகுமரி மாவட்டம் அழகப்பபுரம் பேரூராட்சியில் தற்காலிக மின் ஊழியராகப் பணியாற்றிய கவின் (27) கொலை செய்யப்பட்ட வழக்கில், 4 பேரை அஞ்சுகிராமம் போலீசார் கைது செய்துள்ளனர். குளங்களில் சட்டவிரோதமாகத் தாமரை மலர் வளர்த்தவருக்கு உதவ மறுத்ததே கொலைக்குக் காரணம் என்று போலீசார் தெரிவித்துள்ளனர்.
கொட்டாரம் அருகே அச்சன்குளத்தைச் சேர்ந்த கவின், அழகப்பபுரம் பேரூராட்சியில் தற்காலிக மின் ஊழியராக இருந்தார். அதே பகுதியைச் சேர்ந்த சைரஸ் (32) அங்குள்ள குளங்களில் தாமரை மலர்களை வளர்த்து வந்ததாகக் கூறப்படுகிறது. மலர்களைப் பறிப்பதற்கு வசதியாக மின்விளக்குகளை அணைக்குமாறு அவர் கவினிடம் கேட்டார். கவின் மறுத்ததால், அவரைக் கொல்ல சைரஸ் திட்டமிட்டதாகப் போலீசார் கூறுகின்றனர்.
கடந்த சனிக்கிழமை கவின் ஒரு மீன் கடையில் நின்றிருந்தபோது, ஆயுதங்களுடன் வந்த சைரஸும் அவரது கூட்டாளிகளும் அவரைச் சூழ்ந்து தாக்கிக் கத்தியால் குத்தினர். சம்பவ இடத்திலேயே கவின் உயிரிழந்தார்; தாக்கியவர்கள் தப்பியோடினர். உடலை மீட்ட போலீசார் ஆசாரிப்பள்ளம் அரசு மருத்துவமனைக்குப் பிரேதப் பரிசோதனைக்கு அனுப்பினர்.
தீவிரத் தேடுதலுக்குப் பின் சைரஸ், விசிக நிர்வாகி முத்துக்குமார் உள்ளிட்ட 4 பேர் கைது செய்யப்பட்டுள்ளனர்.
