அமெரிக்காவில் விமானத்தைக் கடத்தப்போவதாக ஒரு பயணி தன் செல்போனில் எழுதியதால், யுனைடெட் ஏர்லைன்ஸ் விமானம் நடுவானில் இருந்து புறப்பட்ட இடத்துக்கே திருப்பப்பட்டது. யாருக்கும் காயம் ஏற்படவில்லை.
விமானம் 1681, சனிக்கிழமை இரவு லாஸ் வேகாஸிலிருந்து நியூஜெர்சியின் நியூவார்க் நோக்கிப் புறப்பட்டது. போயிங் 737 ரகத்தைச் சேர்ந்த அதில் 150 பயணிகளும் 6 பணியாளர்களும் இருந்தனர். புறப்பட்ட சிறிது நேரத்தில், 25 வயதான டான்டே மில்னே என்ற பயணி விமானத்தைக் கடத்தப்போவதாகவும், குறிப்பிட்ட இருக்கைப் பகுதியில் மோதச் செய்யப்போவதாகவும் செல்போனில் தட்டச்சு செய்ததாகக் கூறப்படுகிறது.
அதைக் கவனித்த விமானப் பணிப்பெண் விமானியிடம் தெரிவித்தார். விமானி பாதுகாப்பு நடைமுறைகளைப் பின்பற்றி, விமானப் போக்குவரத்துக் கட்டுப்பாட்டு அதிகாரிகளுக்குத் தகவல் அளித்துவிட்டு, விமானத்தை லாஸ் வேகாஸுக்குத் திருப்பினார். இரவு சுமார் 11.05 மணிக்கு அங்கு தரையிறங்கியதும், காத்திருந்த போலீசார் மில்னேவைக் கைது செய்தனர். பயணிகள் வெளியேற்றப்பட்டு, விமானத்தில் முழுச் சோதனை நடத்தப்பட்டது.
பயங்கரவாத மிரட்டல் விடுத்தது, தவறான தகவல் பரப்பியது ஆகிய குற்றச்சாட்டுகள் அவர் மீது பதியப்பட்டன. 10,000 டாலர் பிணைத் தொகை செலுத்தி அவர் வெளிவந்தார்; அடுத்த விசாரணை செவ்வாய்க்கிழமை நடக்கிறது. பயணிகள் ஞாயிற்றுக்கிழமை மாற்று ஏற்பாட்டில் நியூவார்க் சென்றனர்.
அமெரிக்க விமானப் போக்குவரத்து நிர்வாகம் விசாரித்து வருகிறது. இந்த ஆண்டு இதுவரை வணிக விமானங்களில் பயணிகளின் ஒழுங்கீனச் செயல்கள் தொடர்பாக 1,400-க்கும் அதிகமான சம்பவங்கள் பதிவாகியுள்ளதாகவும் அந்த அமைப்பு கூறியுள்ளது.
