பாரத ஸ்டேட் வங்கியின் (எஸ்பிஐ) 3,897 வாடிக்கையாளர்களின் தனிப்பட்ட தகவல்கள் கசிந்துள்ளதாக வங்கி தெரிவித்துள்ளது. இது குறித்து விசாரிக்க சுயாதீன சைபர் பாதுகாப்பு முகமை ஒன்று நியமிக்கப்பட்டுள்ளது.
அக்டோபர் 21 அன்று பங்குச் சந்தைகளிடம் தாக்கல் செய்த அறிக்கையில், டார்க் வெப்பில் கிடைத்த சுமார் 3.75 லட்சம் பதிவுகளை வங்கி முதற்கட்டமாக ஆய்வு செய்ததாகக் குறிப்பிட்டுள்ளது. அவற்றில் தனிநபர்களை அடையாளம் காணக்கூடிய விவரங்கள் கொண்ட 3,897 பதிவுகள் கண்டறியப்பட்டன.
கசிந்த விவரங்களில் வாடிக்கையாளர்களின் பெயர், பாலினம், பதிவு செய்த செல்போன் எண், பிறந்த தேதி, மின்னஞ்சல் மற்றும் வீட்டு முகவரி ஆகியவை உள்ளன. வங்கிக் கிளை, வாடிக்கையாளர் தகவல் கோப்பு (சிஐஎப்) எண், கடன் தொடர்பான லீடு ஐடி உள்ளிட்ட கடன் பதிவு விவரங்களும் இதில் அடங்கும்.
கணக்குக் கடவுச்சொற்கள், பின் எண்கள் அல்லது பரிவர்த்தனை விவரங்கள் திருடப்பட்டதாக இதுவரை உறுதிப்படுத்தப்படவில்லை என்றும், வாடிக்கையாளர்கள் கணக்கு ஹேக் செய்யப்பட்டதாக அஞ்ச வேண்டியதில்லை என்றும் வங்கி கூறியுள்ளது. வங்கியின் வணிகம் மற்றும் சேவைகள் வழக்கம்போல் தொடர்வதாகவும், கசிவின் முழு அளவை அறிய விரிவான மதிப்பீடு தேவைப்படுவதாகவும் எஸ்பிஐ தெரிவித்துள்ளது.
