நிதி நிறுவன மோசடி வழக்கில் கைது செய்யப்பட்டுள்ள தேவநாதன் யாதவ், வரும் அக்டோபர் 31-ம் தேதிக்குள் சிறையில் சரணடைய வேண்டும் என்று சென்னை உயர் நீதிமன்றம் உத்தரவிட்டுள்ளது. தனியார் மருத்துவமனையில் சிகிச்சை பெற வழங்கிய கால அவகாசத்தை நீட்டிக்க நீதிமன்றம் மறுத்துவிட்டது.
சென்னை மயிலாப்பூர் இந்து பெர்மனெண்ட் ஃபண்ட் நிதி நிறுவனத்தில் முதலீடு செய்த நூற்றுக்கும் மேற்பட்டோரிடம் பல கோடி ரூபாய் மோசடி செய்ததாகத் தொடரப்பட்ட வழக்கில், அந்நிறுவனத்தின் இயக்குநரான தேவநாதன் கைது செய்யப்பட்டு புழல் சிறையில் அடைக்கப்பட்டிருந்தார். தமக்கு அறுவை சிகிச்சை தேவைப்படுவதாகக் கூறி, தனியார் மருத்துவமனையில் சிகிச்சை பெற அனுமதி கேட்டு அவர் தாக்கல் செய்த மனுவை விசாரித்த உயர் நீதிமன்றம், எட்டு வாரங்கள் அவகாசம் அளித்திருந்தது.
அந்த அவகாசத்தை நீட்டிக்கக் கோரும் மனு நீதிபதிகள் சுந்தர் மோகன், ஜி.கே.முத்துக்குமார் அமர்வு முன் இன்று விசாரணைக்கு வந்தது. முதலீட்டாளர்கள் தரப்பில் ஆஜரான வழக்கறிஞர் ஆர்.திருமூர்த்தி, மனு விசாரணைக்கு உகந்ததல்ல என்றும் அதைத் தள்ளுபடி செய்ய வேண்டும் என்றும் வாதிட்டார்.
ஏற்கெனவே பிறப்பிக்கப்பட்ட உத்தரவுக்கு முரணாக வேறு உத்தரவு பிறப்பிக்க முடியாது என்றும், சரணடைவதற்கான அவகாசத்தை நீட்ட எந்தக் காரணமும் இல்லை என்றும் நீதிபதிகள் தெரிவித்தனர். சரணடையும் 31-ம் தேதியன்று, அரசு மருத்துவக் குழு தேவநாதனின் உடல்நிலையை ஆய்வு செய்ய வேண்டும் என்றும் அவர்கள் உத்தரவிட்டனர்.
