சோமாலியாவின் வடகிழக்குக் கடற்பகுதியில் ஈரானைச் சேர்ந்த 'அசினி' என்ற மீன்பிடிக் கப்பல் கடற்கொள்ளையர்களால் கடத்தப்பட்டுள்ளது. கப்பலில் இருந்த 23 பேரின் நிலை குறித்து இன்னும் தகவல் இல்லை.
பண்டார் பெய்லா, ஹஃபுன் நகரங்களுக்கு இடையே கடந்த 29-ம் தேதி இந்தக் கப்பல் சென்றபோது இச்சம்பவம் நடந்தது. கப்பலில் 21 ஈரானியப் பணியாளர்களும் 2 சோமாலிய பாதுகாப்புப் பணியாளர்களும் இருந்தனர். முதலில் ஆயுதங்களுடன் 8 கொள்ளையர்கள் ஏறி பாதுகாப்புப் பணியாளர்களைக் கட்டுப்படுத்தினர்; பின்னர் மேலும் 4 பேர் சேர்ந்ததால் அவர்களின் எண்ணிக்கை 12 ஆனது. பணியாளர்கள் பற்றிய தகவல் கிடைக்கவில்லை என கடல்சார் காவல்படை அதிகாரி ஒருவர் கூறியுள்ளார்.
கடத்தப்பட்ட கப்பலை, தொலைதூரம் சென்று வணிகக் கப்பல்களைத் தாக்குவதற்கான தாய்க்கப்பலாகக் கொள்ளையர்கள் பயன்படுத்தக்கூடும் என இந்தியப் பெருங்கடல் கடல்சார் பாதுகாப்பு மையம் எச்சரித்துள்ளது.
கடந்த ஏப்ரல் முதல் சோமாலியக் கடற்பகுதியில் குறைந்தது 15 கடற்கொள்ளைச் சம்பவங்கள் பதிவாகியுள்ளன; ஜூலை முதல் மட்டும் 3 ஈரானியக் கப்பல்கள் கடத்தப்பட்டுள்ளன. ஐரோப்பிய ஒன்றியக் கடற்படைப் பிரிவான ஆபரேஷன் அட்லாண்டா விசாரணை நடத்தி வருகிறது. அப்பகுதியில் செல்லும் மற்ற கப்பல்கள் எச்சரிக்கையுடன் இருக்கவும், சந்தேகத்துக்குரிய நடமாட்டம் தெரிந்தால் தகவல் தரவும் அறிவுறுத்தப்பட்டுள்ளது.
