தமிழ்நாட்டில் 18,518 போக்சோ வழக்குகள் விசாரணைக்காகக் காத்திருப்பதாக சென்னை உயர் நீதிமன்றத்தில் தாக்கல் செய்யப்பட்ட அறிக்கை தெரிவிக்கிறது. சட்டம் நிர்ணயித்த காலக்கெடுவுக்குள் வழக்குகளை முடிக்க முடியாத நிலை தொடர்கிறது.
அறிக்கையின்படி, 12,983 வழக்குகளில் மட்டுமே 60 நாட்களுக்குள் காவல்துறை இறுதி அறிக்கை தாக்கல் செய்துள்ளது. மேலும் 4,729 வழக்குகளில் இறுதி அறிக்கை தாக்கலான பிறகும் நீதிமன்றம் அவற்றை விசாரணைக்கு எடுக்கவில்லை.
போக்சோ சட்டப்படி பாதிக்கப்பட்ட குழந்தையின் சாட்சியத்தை 30 நாட்களுக்குள் பதிவு செய்ய வேண்டும்; வழக்கை ஓராண்டுக்குள் முடிக்க வேண்டும். ஆனால் 18,870 வழக்குகளில் 3,170-ல், அதாவது 16.7 சதவீதத்தில் மட்டுமே இந்தக் காலக்கெடு பின்பற்றப்பட்டுள்ளது.
தடயவியல், டிஎன்ஏ அறிக்கைகள் தாமதமாகக் கிடைப்பது, சாட்சியம் பதிவு செய்ய தேதி கிடைப்பதில் சிக்கல், நீதிபதி பணியிடங்கள் காலியாக இருப்பது, போதிய சிறப்பு நீதிமன்றங்கள் இல்லாதது ஆகியவை காரணங்களாகக் கூறப்படுகின்றன. காவல்துறைக்கும் நீதிமன்றங்களுக்கும் இடையிலான ஒருங்கிணைப்புக் குறைவும் தாமதத்துக்கு வழிவகுப்பதாக வழக்கறிஞர்கள் தெரிவிக்கின்றனர். விசாரணைக்கு மீண்டும் மீண்டும் அழைக்கப்படுவது குழந்தைகளின் மனநலத்தைப் பாதிப்பதாக குழந்தைகள் மனநல நிபுணர் ராணி சக்கரவர்த்தி கூறுகிறார்.
இந்நிலையில், மேலும் 26 போக்சோ நீதிமன்றங்களை ரூ.46.59 கோடி செலவில் அமைக்க முதல்வர் விஜய் உத்தரவிட்டுள்ளார். எனினும், நீதிமன்றங்களை அதிகரிப்பதோடு காலிப் பணியிடங்களை நிரப்புவது, தடயவியல் அறிக்கைகளை விரைந்து பெறுவது போன்ற நடவடிக்கைகளும் அவசியம் என்று சுட்டிக்காட்டப்படுகிறது.
