எஸ்பிஐ வாடிக்கையாளர்கள் சிலரின் தனிப்பட்ட விவரங்கள் டார்க் வெப்பில் கசிந்த விவகாரத்தில், பாதிக்கப்பட்ட 3,897 பேருக்கும் வங்கி நேரடியாகத் தகவல் தெரிவித்துள்ளது. பணம் எதுவும் பாதிக்கப்படவில்லை என்றும் வங்கி கூறியுள்ளது.
டார்க் வெப்பில் காணப்பட்ட சுமார் 3.75 லட்சம் பதிவுகளை வங்கி முதற்கட்டமாகச் சோதித்தது. அவற்றில் 3,897 வாடிக்கையாளர்களுடையவை என அடையாளம் காணப்பட்டன. பெயர், செல்போன் எண், பிறந்த தேதி, மின்னஞ்சல், முகவரி, கிளை, கடன் விவரங்கள் ஆகியவை கசிந்தவற்றில் அடங்கும்.
மின்னஞ்சல் அல்லது வாட்ஸ்அப்பில் அனுப்பிய செய்தியில், கணக்கில் உள்ள இருப்பும் பணமும் பத்திரமாக இருப்பதாக வங்கி மீண்டும் உறுதி செய்துள்ளது.
மேலும், OTP, PIN, கடவுச்சொல் போன்றவற்றை எவரிடமும் சொல்லக்கூடாது எனவும், சந்தேகமான அழைப்புகள், குறுஞ்செய்திகள், மின்னஞ்சல்கள் வந்தால் விழிப்புடன் இருக்க வேண்டும் எனவும் வங்கி அறிவுறுத்தியுள்ளது.
