எத்தனை புதிய கட்சிகள் உருவானாலும், இனி வரும் தேர்தல்களில் திமுக தனித்தே போட்டியிடும் என்று அக்கட்சியின் முன்னாள் அமைச்சரும் திருமயம் தொகுதி எம்.எல்.ஏ.வுமான எஸ்.ரகுபதி கூறியுள்ளார்.
புதுக்கோட்டை மாவட்டம் திருமயம் அருகே கொன்னையூரில் செய்தியாளர்களிடம் பேசிய அவர், விஜய் கட்சி தொடங்கியபோது தனுஷ் தொடங்கக் கூடாதா என்று கேள்வி எழுப்பினார். யார் வேண்டுமானாலும் அரசியலுக்கு வரலாம் என்று குறிப்பிட்ட அவர், தனுஷ் நற்பணி இயக்கத்தைத் தொடங்கி மக்களைச் சந்தித்து வருவதாகவும், அதை அரசியல் கட்சியாக மாற்றித் தேர்தலில் போட்டியிடுவது குறித்து அவரே முடிவு செய்ய வேண்டும் என்றும் தெரிவித்தார். தனித்து நின்று வெல்லும் ஆற்றல் கொண்ட ஒரே இயக்கம் திமுகதான் என்றும் அவர் கூறினார்.
எந்தவொரு கட்சியையும் வேறொருவரால் அழிக்க முடியாது என்றும், ஒரு கட்சி அழிந்தால் அது அதன் சொந்தத் தவறுகளால்தான் இருக்கும் என்றும் ரகுபதி குறிப்பிட்டார். தவெகவினர் மற்றவர்களை அழித்துவிட்டதாக எண்ணினால் அழிவது அவர்களாகவே இருக்கும் என்றும் அவர் விமர்சித்தார்.
விராலிமலை தொகுதி கடந்த ஐந்து ஆண்டுகளாக இருண்டு கிடந்ததாக அமைச்சர் முகமது பர்வேஸ் பேசியதைச் சுட்டிக்காட்டிய அவர், அதிமுக ஆட்சியில் சி.விஜயபாஸ்கர் அங்கு குறிப்பிடத்தக்க பணிகளைச் செய்யவில்லை என்றார். அத்தொகுதியில் நடைபெறவுள்ள இடைத்தேர்தலில் மக்கள் உரிய பாடம் புகட்டுவார்கள் என்றும், தொகுதி வழக்கு நீதிமன்றத்தில் நிலுவையில் உள்ள நிலையில் விஜயபாஸ்கர்தான் வேட்பாளர் என அமைச்சர் செங்கோட்டையன் அறிவித்ததாகவும் அவர் குறிப்பிட்டார்.
