கோவை கே.கே.நாயுடு மேல்நிலைப் பள்ளியில் படித்த பிளஸ்-1 மாணவன் அகிலன் உயிரிழந்த சம்பவம் அரசியல் களத்தில் எதிரொலிக்கிறது. சாதிய பாகுபாடே இதற்குக் காரணம் என்று குற்றம் சாட்டும் எதிர்க்கட்சித் தலைவர் உதயநிதி ஸ்டாலின், தவெக அரசைக் கடுமையாகச் சாடியுள்ளார்.
அகிலனின் பெற்றோர், உறவினர்களுடன் திமுக, மார்க்சிஸ்ட் கம்யூனிஸ்ட், மே 17 இயக்கம் உள்ளிட்ட அமைப்புகளைச் சேர்ந்த நூற்றுக்கும் மேற்பட்டோர் கோவை ஆட்சியர் அலுவலகம் முன் முழக்கங்களுடன் திரண்டனர். சம்பந்தப்பட்ட ஆசிரியர், தலைமை ஆசிரியர் ஆகியோரைக் கைது செய்ய வேண்டும்; பள்ளியின் அங்கீகாரத்தை ரத்து செய்ய வேண்டும் என்பது அவர்களின் கோரிக்கை. பேரணியாகச் சென்று ஆட்சியர் பவன்குமார் கரியப்பனவரிடம் மனுவும் அளித்தனர். இதற்கிடையில், வகுப்பு ஆசிரியர் விஜயகுமார், தலைமை ஆசிரியர் அருண்குமார் இருவரையும் பள்ளி நிர்வாகம் பணியிடை நீக்கம் செய்துள்ளது.
பீளமேட்டைச் சேர்ந்த பட்டியலின மாணவரான அகிலன், அவிநாசி சாலையிலுள்ள அரசு உதவிபெறும் இப்பள்ளியில் படித்தார். வகுப்புத் தோழர்கள் அவருடன் பேசுவதைத் தவிர்த்ததாகவும், உணவுப் பழக்கம் குறித்து ஆசிரியர் ஒருவர் மாட்டிறைச்சி தொடர்பாகக் கேட்டதால் அவர் மன உளைச்சலுக்கு ஆளானதாகவும் கூறப்படுகிறது. தலைமை ஆசிரியரிடம் புகார் தெரிவித்தும் எந்த நடவடிக்கையும் இல்லை என்றும் தகவல் வெளியாகியுள்ளது.
எக்ஸ் தளத்தில் கருத்து தெரிவித்த உதயநிதி, போராட்டங்கள் நடந்த பிறகே காவல் துறை வழக்குப் பதிவு செய்ததாகக் குறிப்பிட்டு, மாணவரின் மரணத்துக்குக் காரணமான அனைவரும் கைது செய்யப்பட வேண்டும் என்றார். பள்ளிகள் சாதிவெறியின் களமாகாமல் தடுக்க அரசு உடனே நடவடிக்கை எடுக்க வேண்டும் என்றும் அவர் வலியுறுத்தினார்.
