சென்னை தாம்பரம் ரயில் நிலையத்தில் இரண்டு புதிய மின் தூக்கிகள் (லிஃப்ட்) பயன்பாட்டுக்கு வந்துள்ளன. தெற்கு ரயில்வே சென்னைக் கோட்டம் மேற்கொண்டு வரும் மேம்பாட்டுப் பணிகளின் ஒரு பகுதியாக இவை திறக்கப்பட்டுள்ளன.
புதிதாக அமைக்கப்பட்ட 8 மீட்டர் அகல நடைமேம்பாலத்துடன் இணைந்த இவற்றில், ஒன்று 1, 2-ஆவது நடைமேடைகளுக்கும் மற்றொன்று 3, 4-ஆவது நடைமேடைகளுக்கும் செல்கிறது. முதியோர், மாற்றுத்திறனாளிகள், குழந்தைகளுடன் வருவோர், அதிக சுமையுடன் வருவோர் ஆகியோருக்கு இது உதவும்.
நிலையத்தில் பல இடங்களில் சக்கர நாற்காலிகள் வைக்கப்பட்டுள்ளன. சுமை தூக்கும் பணியாளர்களின் விவரம், கட்டணம், தொடர்பு எண்கள் முக்கிய இடங்களில் காட்சிப்படுத்தப்பட்டுள்ளன. மாற்றுத்திறனாளிப் பயணிகளுக்கு இலவச உதவிக்காகத் தனி தொடர்பு எண்ணும் வழங்கப்பட்டுள்ளது; புதிய நடைமேம்பாலம் முழுமையாகப் பயன்பாட்டுக்கு வரும் வரை இந்த உதவி தற்காலிகமாகத் தொடரும்.
திட்டத்தின் கீழ் மொத்தம் 9 மின் தூக்கிகள் அமைக்கப்பட உள்ளன; மீதமுள்ள 7 பணிகளை 2026 டிசம்பருக்குள் முடிக்க ரயில்வே இலக்கு நிர்ணயித்துள்ளது. மேலும் 10 நகரும் படிக்கட்டுகள் (எஸ்கலேட்டர்) அமைக்கப்படுகின்றன; முதல் தொகுதி நவம்பரில் பயன்பாட்டுக்கு வர உள்ளது, மற்றவை டிசம்பருக்குள் முடிக்கப்படும்.
