வேலூர் மாவட்டம் அணைக்கட்டு பகுதியில் உள்ள பட்டாசு கிடங்கில் இன்று காலை திடீரென ஏற்பட்ட தீ விபத்தில், அங்கு வேலை செய்து கொண்டிருந்த இரண்டு பெண்கள் சம்பவ இடத்திலேயே உயிரிழந்தனர்.
உயிரிழந்தவர்கள் கொட்டாவூர் கிராமத்தைச் சேர்ந்த காயத்ரி, சங்கீதா என அடையாளம் காணப்பட்டுள்ளனர். அணைக்கட்டு அப்புகல் சாலையில் ஹரி பிரசாத் என்பவருக்குச் சொந்தமான இந்தக் கிடங்கில், இன்று காலையும் வழக்கம்போல் சில பெண்கள் பணியில் இருந்தனர். அப்போது எதிர்பாராத விதமாகத் தீப்பற்றியது.
தீபாவளிப் பண்டிகை நெருங்குவதால், விற்பனைக்கான பட்டாசுகள் இக்கிடங்கில் இருப்பு வைக்கப்பட்டிருந்தன.
தகவல் கிடைத்ததும் அணைக்கட்டு தீயணைப்பு நிலைய வீரர்கள் விரைந்து வந்து தீயைக் கட்டுக்குள் கொண்டு வந்தனர். உயிரிழந்த இருவரின் உடல்களையும் அணைக்கட்டு போலீஸார் மீட்டனர்.
தீ விபத்து எப்படி ஏற்பட்டது என்பது இதுவரை தெரியவில்லை. விபத்துக்கான காரணம் குறித்துப் போலீஸார் விசாரணை நடத்தி வருகின்றனர். பண்டிகைக் காலத்தில் நிகழ்ந்த இந்த உயிரிழப்பு அப்பகுதியில் சோகத்தை ஏற்படுத்தியுள்ளது. விபத்தின்போது கிடங்கில் இருந்த மற்ற பணியாளர்கள் குறித்த விவரங்கள் இதுவரை வெளியாகவில்லை.
