கொடைக்கானல் அருகே அடுக்கம் – பெரியகுளம் மலைச்சாலையில் கனமழையால் பல இடங்களில் மண்சரிவு ஏற்பட்டு, சாலை அடித்துச் செல்லப்பட்டதால் போக்குவரத்து முற்றிலும் துண்டிக்கப்பட்டுள்ளது.
திண்டுக்கல் மாவட்டம் கொடைக்கானல் மலைப்பகுதியில் சில நாட்களாக மழை தொடர்கிறது. நேற்று (அக்டோபர் 23) பெய்த கனமழையில் இந்தச் சாலையின் பல இடங்களில் மண் சரிந்தது, பாறைகள் உருண்டு விழுந்தன, மரங்களும் முறிந்தன. சில இடங்களில் சாலை பிளவுபட்டுப் பள்ளம் உருவாகியுள்ளது.
கொடைக்கானலுக்கு வத்தலக்குண்டு, பழநி வழியாக வழக்கமான பேருந்துப் போக்குவரத்து நடைபெறுகிறது. மாற்றுப் பாதையான அடுக்கம் – பெரியகுளம் சாலையில் போக்குவரத்து இன்னும் தொடங்கவில்லை. அடுக்கம் பகுதி மலைக்கிராம மக்கள் இருசக்கர வாகனங்களிலும் விளைபொருட்களை ஏற்றிச் செல்லும் சரக்கு வாகனங்களிலும் இச்சாலையையே பயன்படுத்தி வந்ததால் கடுமையாகப் பாதிக்கப்பட்டுள்ளனர்.
நெடுஞ்சாலைத் துறையினர் சேதமடைந்த பகுதிகளைச் சரிசெய்யும் பணியில் ஈடுபட்டுள்ளனர்.
