முன்னாள் அமைச்சர் சி.விஜயபாஸ்கருக்கும் அவரது மனைவிக்கும் சொத்துக் குவிப்பு வழக்கு தொடர்பாக அமலாக்கத்துறை சம்மன் அனுப்பியுள்ளது. நவம்பர் 6 (வெள்ளிக்கிழமை) அன்றும், அடுத்த வாரத்தில் ஒரு நாளிலும் சென்னையில் உள்ள அமலாக்கத்துறை மண்டல அலுவலகத்தில் நேரில் ஆஜராக வேண்டும் என அதில் கூறப்பட்டுள்ளது.
2016-21 அதிமுக ஆட்சியில் சுகாதார அமைச்சராக இருந்தபோது, வருமானத்துக்கு அதிகமாக ரூ.35.79 கோடி மதிப்புள்ள அசையும், அசையா சொத்துகளை வாங்கிக் குவித்ததாக இருவர் மீதும் லஞ்ச ஒழிப்புத்துறை வழக்குப் பதிந்தது. இதன் தொடர்பாக 216 பக்கக் குற்றப்பத்திரிகை புதுக்கோட்டை முதன்மை அமர்வு நீதிமன்றத்தில் தாக்கல் செய்யப்பட்டது. அதன் அடிப்படையில் பணமோசடி தடுப்புச் சட்டத்தின் கீழ் அமலாக்கத்துறையும் வழக்குப் பதிந்து வருகிறது.
2026 பொதுத் தேர்தலில் அதிமுக சார்பில் விராலிமலையில் வென்ற விஜயபாஸ்கர், பின்னர் எம்எல்ஏ பதவியை ராஜினாமா செய்து தவெகவில் இணைந்தார். காலியாக உள்ள அந்தத் தொகுதிக்கு விரைவில் இடைத்தேர்தல் நடக்கவுள்ளது; அதில் தவெக சார்பில் அவர் நிறுத்தப்படலாம் எனக் கூறப்படுகிறது. இந்நிலையில் வந்துள்ள இந்த சம்மன் அரசியல் வட்டாரத்தில் பேசுபொருளாகியுள்ளது.
