மயிலாப்பூர் நிதி நிறுவன மோசடி வழக்கில் கைதான தேவநாதன் யாதவ், வரும் அக்டோபர் 31-ம் தேதிக்குள் சிறையில் சரணடைய வேண்டும் என சென்னை உயர் நீதிமன்றம் உத்தரவிட்டுள்ளது. மருத்துவ சிகிச்சைக்காக வழங்கப்பட்ட அவகாசத்தை நீட்டிக்கக் கோரிய அவரது மனுவை நீதிமன்றம் தள்ளுபடி செய்தது.
தி மயிலாப்பூர் இந்து பெர்மனெட் ஃபண்ட் நிறுவனத்தில் முதலீடு செய்த நூற்றுக்கும் மேற்பட்டவர்களிடம் பல கோடி ரூபாய் மோசடி செய்ததாக, அதன் இயக்குநரான தேவநாதன் யாதவ் மீது வழக்குப் பதியப்பட்டது. கைது செய்யப்பட்ட அவர் புழல் சிறையில் அடைக்கப்பட்டிருந்தார்.
தனக்கு அறுவை சிகிச்சை தேவைப்படுவதால் தனியார் மருத்துவமனையில் சிகிச்சை பெற அனுமதி கோரி அவர் மனு செய்தார். அதை ஏற்ற உயர் நீதிமன்றம், 8 வார அவகாசம் அளித்திருந்தது. அந்த அவகாசத்தை நீட்டிக்கக் கோரிய புதிய மனு நீதிபதிகள் சுந்தர் மோகன், ஜி.கே.முத்துக்குமார் அமர்வில் இன்று விசாரணைக்கு வந்தது. முதலீட்டாளர்கள் தரப்பு வழக்கறிஞர் ஆர்.திருமூர்த்தி, இந்த மனு விசாரணைக்கு உகந்ததல்ல என்று கூறி எதிர்ப்புத் தெரிவித்தார்.
ஏற்கெனவே பிறப்பித்த உத்தரவுக்கு முரணாக வேறு உத்தரவு பிறப்பிக்க முடியாது என்றும், அவகாசத்தை நீட்டிக்க எந்தக் காரணமும் இல்லை என்றும் நீதிபதிகள் தெரிவித்தனர். சரணடையும் நாளன்று அரசு மருத்துவக் குழு தேவநாதனின் உடல்நிலையை ஆய்வு செய்ய வேண்டும் என்றும் அவர்கள் உத்தரவிட்டுள்ளனர்.
