சென்னை மாநகராட்சிப் பகுதிகளில் இதுவரை 1,50,303 தெருநாய்களுக்கு ரேபிஸ் தடுப்பூசி செலுத்தப்பட்டுள்ளதாக மாநகராட்சி ஆணையர் ஜி.எஸ். சமீரன் தெரிவித்துள்ளார். ஆகஸ்ட் 11 முதல் அக்டோபர் 21 வரையிலான காலத்தில் இந்த எண்ணிக்கை எட்டப்பட்டுள்ளது.
வெறிநாய்க்கடி பாதிப்பு இல்லாத தமிழகத்தை உருவாக்க முதலமைச்சர் உத்தரவிட்டதன் அடிப்படையில், 'வெறிநாய்க்கடி நோய் இல்லா சென்னை' என்ற இலக்குடன் இந்த மாபெரும் முகாம் ஆகஸ்ட் 11ஆம் தேதி தொடங்கப்பட்டது. தடுப்பூசியுடன் அக மற்றும் புற ஒட்டுண்ணி நீக்கும் மருந்தும் நாய்களுக்குச் செலுத்தப்படுகிறது.
மண்டல வாரியாகப் பார்த்தால், அம்பத்தூரில் அதிகபட்சமாக 21,844 நாய்களுக்குத் தடுப்பூசி போடப்பட்டுள்ளது. மாதவரத்தில் 15,038, திரு.வி.க. நகரில் 13,849, தண்டையார்பேட்டையில் 12,477, பெருங்குடியில் 12,752, திருவொற்றியூரில் 12,313, அண்ணா நகரில் 11,895 நாய்களுக்குச் செலுத்தப்பட்டுள்ளது. கோடம்பாக்கத்தில் 10,131, இராயபுரத்தில் 8,598, தேனாம்பேட்டையில் 7,782, மணலியில் 7,200, ஆலந்தூரில் 4,343 நாய்களுக்குத் தடுப்பூசி போடப்பட்டுள்ளது.
வளசரவாக்கம், அடையாறு, சோழிங்கநல்லூர் மண்டலங்களில் முகாம் தற்போது நடைபெற்று வருகிறது. இதுவரை வளசரவாக்கத்தில் 3,943, அடையாறில் 3,985, சோழிங்கநல்லூரில் 4,153 நாய்களுக்குத் தடுப்பூசி செலுத்தப்பட்டுள்ளது.
இந்த இலக்கை அடைய பொதுமக்கள், செல்லப்பிராணி உரிமையாளர்கள், விலங்கு நல ஆர்வலர்கள் ஒத்துழைக்க வேண்டும் என்றும் மாநகராட்சி கேட்டுக்கொண்டுள்ளது.
