வடகிழக்குப் பருவமழை தொடங்கியுள்ள நிலையில், நோய்ப் பரவலைத் தடுத்தல், உயிரிழப்பைத் தவிர்த்தல், தடையற்ற மருத்துவச் சேவை ஆகிய மூன்று இலக்குகளுடன் அவசரகால நடவடிக்கைகள் தீவிரப்படுத்தப்பட்டுள்ளதாகச் சுகாதாரத் துறை தெரிவித்துள்ளது.
பாம்புக்கடி விஷமுறிவு மருந்துகள், ஓஆர்எஸ், குளோரின் மாத்திரைகள் உள்ளிட்ட மருத்துவப் பொருட்கள் 7 நாட்களுக்குத் தேவையான அளவு இருப்பு வைக்கப்பட்டுள்ளன. 24 மணி நேர மின்சாரம், ஆக்சிஜன் வசதி, வென்டிலேட்டர்கள், 108 ஆம்புலன்ஸ்கள் ஆகியவையும் தயார் நிலையில் உள்ளன.
சென்னை, திருவள்ளூர், கடலூர், கன்னியாகுமரி உள்ளிட்ட 15 கடலோர மற்றும் வெள்ள அபாய மாவட்டங்களின் சுகாதார நிலையங்களுக்குச் சிறப்பு முன்னுரிமை அளிக்கப்பட்டுள்ளது; மருத்துவமனை வளாகங்களில் நீரிறைக்கும் பம்புகளும் தயாராக உள்ளன.
டெங்கு, எலிக்காய்ச்சல் பரவாமல் இருக்கக் குடிநீரில் குளோரின் கலக்கவும், கொசுப்புழு ஒழிப்புப் பணிகளைத் தீவிரப்படுத்தவும் உத்தரவிடப்பட்டுள்ளது. காய்ச்சல் ஏற்பட்டால் உடனடியாக அரசு மருத்துவமனையை அணுக வேண்டும் என்றும், பிரசவ காலம் நெருங்கிய கர்ப்பிணிகள் முன்கூட்டியே பாதுகாப்பான இடங்களுக்கு மாற வேண்டும் என்றும் அறிவுறுத்தப்பட்டுள்ளது.
