மணிப்பூரில் மீண்டும் அமைதியின்மை நிலவுவதை முன்வைத்து, மத்திய அரசுக்குப் பல கேள்விகளைக் காங்கிரஸ் தலைவர் மல்லிகார்ஜுன கார்கே எழுப்பியுள்ளார். மூன்று ஆண்டுகளாகத் தொடரும் நிர்வாகத் தோல்விக்குப் பொறுப்பேற்பது யார் என்பது அவரது முதன்மைக் கேள்வி.
2023 மே மாதம் மெய்தி, குக்கி சமூகங்களுக்கு இடையில் தொடங்கிய மோதலில் 300-க்கும் அதிகமானோர் உயிரிழந்தனர். அதன் பிறகு குடியரசுத் தலைவர் ஆட்சி அமல்படுத்தப்பட்டது, முதல்வர் மாற்றப்பட்டார், பாஜக தலைமையில் மீண்டும் அரசு அமைந்தது. இவ்வளவு நடந்தும் நிலையான அமைதி ஏற்படவில்லை என்று கார்கே கூறினார். மோதல் தொடங்கிய பின் பிரதமர் மோடி நீண்ட காலம் அங்கு செல்லவில்லை என்பதையும் அவர் குறிப்பிட்டார்.
உள்துறை அமைச்சர் அமித் ஷா உருவாக்கிய அமைதிக் குழு தற்போது என்ன நிலையில் உள்ளது; பாதுகாப்பை உறுதிசெய்ய என்ன செய்யப்பட்டது; உச்சநீதிமன்றம் நியமித்த முன்னாள் நீதிபதி கீதா மிட்டல் குழு அளித்த பரிந்துரைகளில் எவை நடைமுறைக்கு வந்தன ஆகியவற்றுக்கும் அரசு பதில் சொல்ல வேண்டும் என்று அவர் கேட்டுள்ளார்.
மக்களுக்கு நீதியும் பாதுகாப்பும் உறுதியான அமைதியும் கிடைக்க மத்திய அரசு உடனடியாகச் செயல்பட வேண்டும் என்றும் அவர் வலியுறுத்தினார்.
