ஐரோப்பிய சாம்பியன்ஸ் லீக் கால்பந்து தொடரில், பாரிஸ் செயிண்ட்-ஜெர்மைன் (பிஎஸ்ஜி) அணி பார்சிலோனாவை 4-2 என்ற கோல் கணக்கில் தோற்கடித்து, புள்ளிப்பட்டியலில் முதலிடத்தைத் தக்கவைத்துக் கொண்டது.
பாரிஸில் நடந்த இந்த ஆட்டத்தில் இரு அணிகளும் மாறி மாறி கோல் அடித்ததால் இறுதிக் கட்டம் வரை பரபரப்பு நீடித்தது. 38-வது நிமிடத்தில் டெசயர் டூயே அடித்த கோலால், முதல் பாதியை பிஎஸ்ஜி 1-0 என்ற முன்னிலையுடன் நிறைவு செய்தது.
இரண்டாம் பாதியில் தாக்குதலைத் தீவிரப்படுத்திய பார்சிலோனாவுக்கு 55-வது நிமிடத்தில் சேவி எஸ்பார்ட் சமநிலை கோல் பெற்றுத் தந்தார். 72-வது நிமிடத்தில் லூகாஸ் ஹெர்னாண்டஸ் மூலம் பிஎஸ்ஜி மீண்டும் முன்னிலை பெற, 79-வது நிமிடத்தில் பார்சிலோனாவின் இளம் வீரர் லாமின் யமால் ஸ்கோரை 2-2 என சமன் செய்தார்.
ஆனால் கடைசி பத்து நிமிடங்களில் பிஎஸ்ஜி ஆதிக்கம் செலுத்தியது. 81-வது நிமிடத்தில் விட்டின்ஹா, 86-வது நிமிடத்தில் பபியான் ரூயிஸ் ஆகியோர் கோல் அடித்து வெற்றியை உறுதி செய்தனர்.
நடப்புத் தொடரில் ஆடிய மூன்று ஆட்டங்களிலும் பிஎஸ்ஜி வெற்றி பெற்றுள்ளது. சாம்பியன்ஸ் லீக்கில் அந்த அணி தொடர்ந்து 13 போட்டிகளாகத் தோல்வியைச் சந்திக்காமல் வலம் வருகிறது.
