ஸ்ரீரங்கம் ரங்கநாதர் கோயிலின் வைகுண்ட ஏகாதசி பெருவிழாவுக்கான தொடக்க நிகழ்வாக, திருக்கொட்டகை முகூர்த்தக்கால் ஊன்றும் வைபவம் இன்று காலை சிறப்பாக நடைபெற்றது.
ஆயிரங்கால் மண்டபம் முன்பு முகூர்த்தக்காலுக்குச் சிறப்புப் பூஜைகள், புண்ணியாவாகனம், மஹா தீபாராதனை நடைபெற்றன. வேத மந்திரங்களும் மங்கள இசையும் முழங்க, கோயில் அர்ச்சகர்கள் முகூர்த்தக்காலை ஊன்றினர். அப்போது கோயில் யானைகளான ஆண்டாளும் லட்சுமியும் துதிக்கையை உயர்த்தி பிளிறியது பக்தர்களைப் பரவசப்படுத்தியது. கோயில் இணை ஆணையர் சிவராம்குமார் தலைமையில் ஏற்பாடுகள் செய்யப்பட்டிருந்தன.
இந்த ஆண்டு பெருவிழா டிசம்பர் 9-ம் தேதி திருநெடுந்தாண்டகம் என்ற ஐதீக உற்சவத்துடன் தொடங்குகிறது. டிசம்பர் 10-ல் பகல்பத்து (திருமொழித் திருநாள்) தொடங்கும். டிசம்பர் 20 முதல் ராப்பத்து (திருவாய்மொழித் திருநாள்) நடைபெறும். மொத்தம் 20 நாட்கள் நடக்கும் இவ்விழாவில், நம்பெருமாள் முன்னிலையில் அரையர்கள் நாலாயிர திவ்ய பிரபந்தப் பாசுரங்களை அபிநயத்துடன் பாடுவர்.
முக்கிய நிகழ்வுகளின் தேதிகள்:
– டிசம்பர் 19: மோகினி அலங்காரம்
– டிசம்பர் 20: சொர்க்கவாசல் (பரமபதவாசல்) திறப்பு
– டிசம்பர் 26: திருக்கைத்தல சேவை
– டிசம்பர் 27: திருமங்கை மன்னன் வேடுபறி
– டிசம்பர் 29: தீர்த்தவாரி
– டிசம்பர் 30: நம்மாழ்வார் மோட்சம்
பல மாநிலங்கள், நாடுகளிலிருந்தும் பல லட்சம் பக்தர்கள் இவ்விழாவுக்கு வருகை தருவது வழக்கம்.
