திருப்பூர் மாவட்டம் நொய்யல் ஆற்றில் இன்று காலை மீண்டும் வெள்ளப்பெருக்கு ஏற்பட்டதால், அணைப்பாளையம் தரைப்பாலம் முழுவதுமாக நீரில் மூழ்கியது. இதனால் அப்பகுதியில் போக்குவரத்து முற்றிலும் துண்டிக்கப்பட்டுள்ளது.
திருப்பூர் மாநகரிலும் நீர்ப்பிடிப்புப் பகுதிகளிலும் நேற்று பெய்த கனமழையே இதற்குக் காரணம். மங்கலம் சாலையையும் கல்லூரி சாலையையும் இணைக்கும் முக்கியப் பாதை இது என்பதால் வாகன ஓட்டிகளும் பொதுமக்களும் கடும் சிரமத்துக்கு உள்ளாகியுள்ளனர்.
இந்தப் பாலம் அக்டோபர் 16, 23 ஆகிய தேதிகளிலும் மழை வெள்ளத்தில் மூழ்கியிருந்தது; இன்று மூன்றாவது முறையாக இது நிகழ்ந்துள்ளது. ஆற்றில் பாயும் நீருடன் நகரின் கழிவுநீரும் கலந்து கருமை நிறத்தில் ஓடுகிறது.
பாதுகாப்பு கருதி போலீசாரும் அதிகாரிகளும் அப்பகுதியில் கண்காணிப்பில் ஈடுபட்டுள்ளனர். போக்குவரத்து மாற்றுப் பாதைகளில் திருப்பிவிடப்பட்டுள்ளது.
