2026-ஆம் ஆண்டுக்கான உலகளாவிய பசி குறியீட்டில் மொத்தமுள்ள 122 நாடுகளில் இந்தியா 100-ஆவது இடத்தில் உள்ளது. 24.1 மதிப்பெண்ணுடன் "தீவிரம்" என்ற பிரிவிலேயே நாடு தொடர்கிறது.
ஜெர்மனியின் வெல்ட்ஹங்கர்ஹில்ஃப், அயர்லாந்தின் கன்சர்ன் வேர்ல்டுவைட் ஆகிய அமைப்புகள் இந்த அறிக்கையை வெளியிட்டுள்ளன. இந்தியா 2012-ஆம் ஆண்டிலிருந்து இதே பிரிவிலிருந்து வெளியேற முடியவில்லை என அறிக்கை சுட்டிக்காட்டுகிறது.
இந்தியாவில் மக்கள்தொகையில் 9.8 சதவீதம் பேர் ஊட்டச்சத்துக் குறைபாட்டுடன் உள்ளனர். ஐந்து வயதுக்குட்பட்ட குழந்தைகளில் 29.3 சதவீதம் பேருக்கு வளர்ச்சி குன்றியுள்ளது. குழந்தைகளிடையே உயரத்துக்கேற்ற எடையின்மை 16.9 சதவீதத்திலிருந்து 19 சதவீதமாக உயர்ந்துள்ளது; இது தெற்காசியாவில் மிக அதிகம்.
2018 முதல் 2026 வரை இந்தியாவின் மதிப்பெண் 25.8-இலிருந்து 1.7 புள்ளிகள் மட்டுமே குறைந்துள்ளது. 2006 முதல் 2012 வரை ஏற்பட்ட 8.2 புள்ளி முன்னேற்றத்துடன் ஒப்பிட்டால் இது மிகக் குறைவு. தெற்காசியாவின் சராசரி மதிப்பெண் 23.5.
அண்டை நாடுகளில் இலங்கை 53-ஆவது, நேபாளம் 72-ஆவது, வங்கதேசம் 84-ஆவது இடத்தில் இந்தியாவை விட முன்னிலையில் உள்ளன. பாகிஸ்தான் 106-ஆவது, ஆப்கானிஸ்தான் 108-ஆவது இடத்தில் உள்ளன.
