‘பொன்னியின் செல்வன் 2’ படத்தின் இசை மற்றும் டிரெய்லரை நடிகர் கமல்ஹாசன் வெளியிடவிருப்பதாக அறிவிக்கப்பட்டுள்ளது.
மணிரத்னம் இயக்கத்தில் விக்ரம், ஜெயம் ரவி, கார்த்தி, த்ரிஷா, ஐஸ்வர்யா ராய், பிரகாஷ் ராஜ், ஐஸ்வர்யா லட்சுமி, பிரபு, விக்ரம் பிரபு, சரத்குமார், பார்த்திபன் உள்ளிட்டோர் நடித்துள்ள திரைப்படம் ‘பொன்னியின் செல்வன் 2’. லைகா மற்றும் மெட்ராஸ் டாக்கீஸ் இணைந்து தயாரித்துள்ள இப்படத்திற்கு ஏ.ஆர்.ரஹ்மான் இசையமைத்துள்ளார்.
எழுத்தாளர் கல்கியின் வரலாற்றுப் புதினமாக ’பொன்னியின் செல்வன்’ நாவலை கதைக்களமாகக் கொண்டு உருவான இப்படத்தின் முதல் பாகம் பெரும் வரவேற்பைப் பெற்று வசூலை அள்ளியது. பல ஆண்டுகளாக திரைப்படமாக எடுக்க முயற்சிகள் மேற்கொள்ளப்பட்டு, மணிரத்னம் இயக்கத்தில் திரைப்படமாக வெளியான ’பொன்னியின் செல்வன்’ பலதரப்பு மக்களையும் கவர்ந்து இரண்டாம் பாகம் மீதான ஆர்வத்தை அதிகப்படுத்தியது.
இந்நிலையில், இதன் இரண்டாம் பாகம் ஏப்ரல் 28ல் திரையரங்குகளில் வெளியாகிறது. இப்படத்தின் முதல் பாடலான ’அக நக’ சில தினங்களுக்கு முன்பாக வெளியாகி பலரையும் வைப் மோடில் வைத்திருக்கும் நிலையில், இதன் இசை மற்றும் டிரெய்லர் வெளியீட்டு விழா இம்மாதம் 29ம் தேதி சென்னை நேரு உள்விளையாட்டு அரங்கில் நடைபெறவிருக்கிறது.
இதனிடையே, ’பொன்னியின் செல்வன் 2’ படத்தின் இசை மற்றும் டிரெய்லரை உலகநாயகன் கமல்ஹாசன் வெளியிடவிருப்பதாக படக்குழு அறிவித்துள்ளது. ஏற்கனவே இப்படத்தின் முதல் பாகத்தில், முதலில் சில நிமிடங்களுக்கு ஒளிபரப்பாகும் காட்சிகளுக்கு கமல்ஹாசன் குரல் கொடுத்திருப்பார். இப்படத்தின் ’அக நக’ பாடலைத் தொடர்ந்து படத்தின் டிரெய்லர் மற்றும் பிற பாடல்களைக் கேட்க ரசிகர்கள் ஆவலுடன் காத்துக்கொண்டிருக்கின்றனர்.
