ரஜினி நடிப்பில் உருவாகியுள்ள ‘அண்ணாத்த’ திரைப்படம் தீபாவளியை முன்னிட்டு நவம்பர் 4ம் தேதி வெளியாகவுள்ள நிலையில் அப்படத்தின் டீசர் அக்டோபர் 14ம் தேதி வெளியாகவுள்ளதாக அதிகாரப்பூர்வ அறிவிப்பு வெளியாகியிருக்கிறது.
இந்த ஆண்டு தீபாவளிக்கு அண்ணாத்த திரைப்படம் வெளியாகவிருக்கும் நிலையில் சமீபத்தில் இரண்டு பாடல்கள் வெளியிடப்பட்டு ஹிட்டடித்தது. ரஜினி அப்பாடல்களில் இளமை ததும்ப நடனமாடியிருப்பதை அவரது ரசிகர்கள் கொண்டாடி வருகிறார்கள்.
சன் பிக்சர்ஸ் கலாநிதி மாறன் தயாரிப்பில் சிறுத்தை சிவா இயக்கத்தில் உருவாகியிருக்கும் இத்திரைப்படத்தில் ரஜினிக்கு ஜோடியாக நயன்தாரா நடிக்கிறார். மீனா, குஷ்பு, பிரகாஷ் ராஜ், சதீஷ், சூரி ஆகியோர் முக்கியக் கதாப்பாத்திரத்தில் நடிக்கின்றனர். இமான் இசையமைக்கிறார். ரஜினி நடிப்பில் இதற்கு முன் வெளிவந்த ‘தர்பார்’ படம் பெரிய அளவிலான வெற்றியைப் பெறவில்லை. இந்நிலையில் அஜித்தை வைத்து வீரம், விஸ்வாசம் போன்ற வெற்றிப்படங்களைக் கொடுத்த சிறுத்தை சிவாவுடன் ரஜினி இணையும்போதே படம் பெரிய வெற்றி பெறும் என்கிற நம்பிக்கையில் ரசிகர்கள் இருக்கிறார்கள். பாடல்களும் அதற்கான எதிர்பார்ப்பைக்கூட்டியிருக்கும் நிலையில் எப்போது டீசர், ட்ரெய்லர் வெளியாகும் என ரசிகர்கள் காத்துக் கொண்டிருந்தனர்.
இந்நிலையில், அக்டோபர் 14ம் தேதி மாலை 6 மணிக்கு டீசர் வெளியிடப்படும் என்கிற அறிவிப்பு வெளியாகி ரசிகர்களை மகிழ்ச்சிக்குள்ளாக்கியிருக்கிறது.
