சிலம்பரசன் நடிப்பில் உருவாகியுள்ள ‘பத்து தல’ படத்தின் டீசர் நாளை வெளியாகும் என்று அதிகாரப்பூர்வமாக அறிவிக்கப்பட்டுள்ளது.
ஒபிலி என்.கிருஷ்ணா இயக்கத்தில் சிலம்பரசன், கெளதம் கார்த்திக், ப்ரியா பவானி ஷங்கர், கலையரசன் உள்ளிட்டோர் நடிப்பில் உருவாகியுள்ள திரைப்படம் ’பத்து தல’. ஸ்டுடியோ கிரீன் நிறுவனம் சார்பில் கே.இ.ஞானவேல் ராஜா தயாரித்துள்ள இப்படத்திற்கு ஏ.ஆர்.ரஹ்மான் இசையமைத்துள்ளார்.
கேங்ஸ்டர் க்ரைம் த்ரில்லர் படமாக உருவாகியுள்ள இப்படம் இம்மாதம் 30ம் தேதி திரையரங்குகளில் வெளியாகிறது. அண்மையில் இப்படத்திலிருந்து ஏ.ஆர்.ரஹ்மான் குரலில் ’நம்ம சத்தம்’ பாடல் வெளியாகி வரவேற்பைப் பெற்றது.
இந்த நிலையில், இப்படத்தின் டீசர் நாளை வெளியாகும் என்று படக்குழு அதிகாரப்பூர்வமாக அறிவித்துள்ளது. அதன்படி நாளை மாலை 5.31 மணிக்கு பத்து தல படத்தின் டீசர் வெளியாகிறது.
சிலம்பரசன் நடித்து வெளியான மாநாடு, வெந்து தணிந்தது காடு உள்ளிட்ட படங்கள் ஹிட்டடித்த நிலையில், கேங்ஸ்டர் கதாபாத்திரத்தில் அவர் நடித்துள்ள ’பத்து தல’ படம் குறித்தான எதிர்பார்ப்பு ரசிகர்களிடையே மிகைத்துள்ளது. நாளை டீசர் வெளியாகும் நிலையில், விரைவில் இப்படத்தின் டிரெய்லர் வெளியிடப்படும் என்று எதிர்பார்க்கப்படுகிறது.
