ரஜினி நடிப்பில் உருவாகியுள்ள ‘அண்ணாத்த’ திரைப்படம் தீபாவளியை முன்னிட்டு நவம்பர் 4ம் தேதி வெளியாகிறது. இதற்கான அதிகாரப்பூர்வ அறிவிப்பும் ஃபர்ஸ்ட்லுக் போஸ்டரும் வெளியாகியிருக்கிறது.
சன் பிக்சர்ஸ் கலாநிதி மாறன் தயாரிப்பில் சிறுத்தை சிவா இயக்கத்தில் உருவாகியிருக்கும் இத்திரைப்படத்தில் ரஜினிக்கு ஜோடியாக நயன்தாரா நடிக்கிறார். மீனா, குஷ்பு, பிரகாஷ் ராஜ், சதீஷ், சூரி ஆகியோர் முக்கியக் கதாப்பாத்திரத்தில் நடிக்கின்றனர். இமான் இசையமைக்கிறார். ரஜினி நடிப்பில் இதற்கு முன் வெளிவந்த ‘தர்பார்’ படம் பெரிய அளவிலான வெற்றியைப் பெறவில்லை. இந்நிலையில் அஜித்தை வைத்து வீரம், விஸ்வாசம் போன்ற வெற்றிப்படங்களைக் கொடுத்த சிறுத்தை சிவாவுடன் ரஜினி இணையும்போதே படம் பெரிய வெற்றி பெறும் என்கிற நம்பிக்கையில் ரசிகர்கள் இருக்கிறார்கள்.
இத்திரைப்படம் இந்த தீபாவளிக்கு நிச்சயம் வெளியாகும் என்று எதிர்பார்க்கப்பட்ட நிலையில் அதற்கான அதிகாரப்பூர்வ அறிவிப்பு வெளியாகியிருக்கிறது. நவம்பர் 4ம் தேதி தீபாவளியன்று ‘அண்ணத்த’ திரைப்படம் வெளியாவதால் ரஜினி ரசிகர்களுக்கு இது ‘அண்ணாத்த’ தீபாவளியாக இருக்கும். ரசிகர்கள் மட்டுமல்லாமல் அனைத்துத் தரப்பினரையும் ஈர்க்கும் ஆற்றல் கொண்டவர் ரஜினி என்பதால் குடும்பம் குடும்பமாக ‘அண்ணாத்த’ படத்துக்கு வருவார்கள் என்கிற எதிர்பார்ப்பு திரையரங்க உரிமையாளர்களிடம் நிலவுகிறது.
